കടപ്ലാവ്

പുരയുടെ പടിഞ്ഞാറെചരിവിലാകരയിലായ്,

ശാഖികൾ പങ്കിട്ട്,ചില്ലകൾ തളിരിട്ടളം-

തെന്നലരുമയായ്തടവിതലോടുമ്പോൾ,

തലയാട്ടിനിന്നുചിരിക്കും'കടപ്ലാവേ'......

ഒരോരോ ഗർഭക്കനിനിന്നിൽ വിടരുമ്പൊൾ,

പൊക്കിൾകൊടിമുറിച്ചാക്കനിയിറുക്കുമ്പോൾ,

ഉണ്ണിയെവേർപെട്ടൊരമ്മതൻ ഹൃത്തുപോൽ,

തൂവെള്ളപാൽകണ്ണീർനീ പൊഴിക്കാറില്ലേ....

എത്രമധ്യാഹ്നമെൻ തീന്മേശയിൽ വന്നി-

ട്ടെത്രവിവിധമാംരൂപഭാവങ്ങളിലെ-

ൻ ജിഹ്വതന്നിലെ രസമുകുളങ്ങളിലെ-

ത്ര നവനവ സ്വാദ് പടർത്തിനീ.

ചെടിയായിവന്നുനീ..കമ്പൊടു കവരമായ്,

പൂവായി പൂവിൽ തുടിക്കുന്നഗർഭമായ്,

ഉണ്ണികൾ മൊട്ടിട്ടുനിന്നിടും ശാഖിയിൽ;ലെത്ര-

നയന മനോഹര ചിത്രമായ്.

ഗതിതെറ്റിവന്നൊരാ പടിഞ്ഞാറൻ കാറ്റിന്റെ,

ഗതികെട്ട നേരത്തെചടുലത കൊണ്ടയ്യോ!!!

കടമുറിഞ്ഞടിതെറ്റി,നിലം പൊത്തി വീണിതാ,

നീയും നിന്നിൽമുളയിട്ട സ്വപ്നവും.

നിർദ്ദയം ഞാൻനിന്റെ തടിയറുത്തിട്ടിട്ട്,

കമ്പുകൾ കോതിയാതെങ്ങിനു വളമിട്ടു.

മർത്യനോളംസ്വാർത്ഥമോഹികൾവേറെയീ,

ഭൂമിയിലില്ല...നി:സംശയംചൊല്ലിടാം...