പതിച്ചി....

സപ്തതിതന്നവശത തന്നിലും,

ഓടിയെത്തിടുമോരോ പിറപ്പിലും.

എത്രയെത്ര കുരുന്നു പൂമേനികൾ,

തേച്ചുമിനുക്കിയെടുത്തൊരെൻ കൈയ്യുകൾ.

പെറ്റ പെണ്ണിനെ തൈലമുഴിഞ്ഞിട്ട്,

വെക്കപൊന്തിടും വേതിൽ മെഴുക്കണം,

അരിയാറുമങ്ങാടിയറുപതും ചേർത്തിട്ട്,

പുഷ്ടി നേടുവാൻ' രക്ഷ'വെരകണം.

കുഞ്ഞുപൂമേനിയെണ്ണ തടവീട്ട്,

മെല്ലെ,മെല്ലെ തഴുകിയൊതുക്കണം.

എണ്ണതൊട്ട പെരുവിരൽ തുമ്പിനാൽ,

'ചില്ലി'തന്നിലെ കണ്മഷി മായ്ക്കണം.

നീർത്തുള്ളിയിക്കിളി കൂട്ടുന്ന കുഞ്ഞിനെ,

കൊഞ്ചിച്ച്,ലാളിച്ച് മെല്ലെ നീരാട്ടണം.

കൈകളിലാലോലമാട്ടിയെടുത്തിട്ട്,

കാതോരമൂതണം;നീർത്തുള്ളി പോക്കണം.

ഇന്ന് ഗർഭം ചുമക്കുന്ന നാരിതൻ-

തത്രപാടുകണ്ടൊട്ടു ചിരിച്ചിട്ട്.

നെല്ല് കുത്തുന്ന നേരത്ത് പെണ്ണുങ്ങൾ,

പണ്ട് പെറ്റ പഴങ്കഥ ചൊല്ലുന്നു.

കിട്ടിടും നൂലുകെട്ടുന്ന നേരത്ത്,

കൈമടക്കും,മൊരുപുതു വസ്ത്രവും.

നൂറുപേരുടെ പേറെടുത്തെങ്കിലും,

കൊച്ചു കൂരയിലേകാന്ത ജീവിതം...